Табасаранский театр
Табасаранский театр
Табасаранский театр

ТЕАТРИН ЙИСАН - Ц1ИЙИ СПЕКТАКЛЬ

Шюшеханум Керимова 
     Апрелин 9-пи йигъан Дербент шагьриъ айи Лезги театриъ Гьюкуматдин табасаран драмайин театрин коллективди А. Чеховдин «Теклиф» ва В.Соллогубдин «К1ван назуквалиан - бала» пьесйирин бинайиинди гьязур гъапIу «Сумчрин гъалабулугъ» кIуру спектакль улупну.
     Му спектакль диву режиссёр, Калмыкия Республикайин искусствойин лайикьлу вакил Сергей Бурлаченко, хъа художник – Елена Варова ву. Спектакль РД-йин лайикьлу пишекар Абдурягьим Аьбдурягьмановди табасаран чIалназ таржума гъапIну.
 
     Му спектаклиинди ихь театрин актерари заан устадвал, чпиз ужуб дережайиинди ролар уйнамиш апIуз аьгъювал, йигълан-йигъаз устадвалин дережа за шулайивал улупну. Дупну ккундуки, улхьан йисариси дарди, гьамус спектаклариъ иштирак шулайи актерариз гьар спектаклиз цIийи костюмар, декорацйир гьязур апIура. 
     «Ихь театрин актерариин урус театрарин актерар бахил шул кIури, хиял вуйиз. Дурари устадвалиинди ролар уйнамиш апIура. Ихь дагълу халкьариз хас дару аьдатариъ «учIвуз», рягьятди ролар уйнамиш апIуз хьпан бадали, актерари ужуб зегьмет дизигнайиб аьгъю шула», – гъапнийи йиз багахь деънайи Дербент шагьрин 1-пи нумрайин мектебдин директор Наида Исмяиловайи ва Дербент райондин образованиейин отделин начальник Сона Гьяжибеговайи. 
      Дугъриданра, спектакль ккудубкIну, хулаз гъягъюз гьязур шулайи вари тамашичйирин машарик аьлхъюб кайи, ва театриз гъафидариз му хябяхъ кьаназ кIваинди гъубзур кIури, умудлу вуза. Гъийин девриъ пулизна мутмуйиз икрам апIури, кьюб маш гъивну уьмур хъапIрайидариз тясир апIруси, спектаклиъ жумартди, албагну, гьякьлуди яшамиш гъахьиш ужу вуйиб тасдикь апIура. 
     Ав, театрин коллектив, режиссер Сергей Бурлаченко ва художник Елена Варова устадвалиинди дивнайи спектаклихъди тебрик апIури, дурариз хъана заан хъуркьувалар, артухъдиси тамашичйир ккун апIурхьа!
                                         Газета «Зори Табасарана» № 15 от 12-апреля 2019 г.